Ыраас санаа ыллыктаах,
Үтүө санаа үктэллээх.
Ыал кута хоннохтоох,
Алаһа дьиэ илгэлээх,
Ырыаҕа ылланар,
Хоһооҥҥо хоһуйуллар
Саха дьахтара барахсан. Читать далее «Саха дьахтара»
Кыыс анала
Саха саргытын сайыннара,
Кэлэр кэскили кэҥэтэ,
Күн сиригэр кэллэ кэрэ
Кып-кыра, нап-нарын киһичээн —
Омук ымыыта, кыыс оҕо буолан,
Үүнэр сайдар үктэллэнэн.
Айылҕаҥ алгыһынан арчыланан,
Ситэҕин сиэдэрэй сибэкки буолан.
Күн сырдыгынан үүнэ сайдан,
Чэчир кэриэтэ чэчирии тупсаҥҥын,
Умсугутар эбиккин олоҕуҥ аналын
Иитэр ийэ дьоло тосхойон.
Дьолунан туолар уйаҕар
Иитэр эбиккин кэрэлэргин,
Кэлэр кэскили кэҥэтэ
Улаатыннарар эбиккин уолаттаргын,
Саха омугу үксэтэ
Толуу – мааны дьахтар буолан.
Ситэн-хотон түспэтийэн
Саха аймах салаллар саргыта,
Уруйдаах олох тутуллар туоната
Түс ыал амарах ийэтэ — эн буолаҕын.
Далбар хотун талыыта,
Кэс тыл кэрэһитэ,
Эйэҕэс эбээ эриэккэһэ
Буола үүнэҕин.
Иэйиэхсит
Сааскы саҥа дьыл
Саргылаах, сардаҥалаах,
Салаллар сайын саҕахтаах,
Устар күн дьаралыктаах,
Тэнийэн ыраастыыр ыыс,
Кии буруо арчылаах,
Салама ситии тардыллан
Сылдьар ыллык тутуллаах,
Амарах санаа аргыстаах
Аһыныгас Иэйиэхсит эдьиийбит
Арчылаан ааспыт алаастарын,
Үүт үрүмэччи сиэтиилээх
Сылдьыбыт сыһыыларын,
Ситэр сибэкки симэхтээх
Хонон турбут хонууларын,
Күөҕэ үксэлэһэн үүнэр
Суунан ааспыт ууларгар
Айыыҥ кустуга дьиримнии оонньуур.
Имэрийэр, илгийэр
Сылаас салгынын,
Кууһан-илбийэн эмтиир
Ибирэр-ибирдиир
Намчы ардаҕыҥ,
Абылаан арчылыыр
Үтүө дьайыылаах
Иэйэхсит эдьиийбит,
Аны да
Салаллан арчылаан
Ааһаар дуу.
Дьыл кэмнэрэ
Салалыннын сааспыт сардаҥата
Саргылаах саҥа дьыл аргыстанан,
Туллук чыычаах туоһуланан,
Түһэр таммах утахтанан.
Саҕаланнын сайыммыт саргыта,
Сарыала итиинэн угуттаан,
Далбар күөҕүн тэнитэн,
Дэлэттин үрүҥ илгэни үксэтэ.
Күлэр көмүс күһүммүт,
Күндүлээтин быстыбат быйаҥынан,
Уйгулаах олоҕуҥ ньууругар,
Уруу-ыал, бар-дьон аналыгар.
Кыыдааннаах кырыа кыһыммыт
Кыһарыйбатын тымныытынан.
Дьаһаныыбыт-тэриллиибит,
Дьолу-эрэли тосхойуо биһиэхэ.
Алгыс
Үтүө күҥҥүт үүммүтүнэн,
Бэлиэ кэмҥит кэлбитинэн!
Өрөгөйдөөх үбүлүөйгүт
Үүнэр үктэлэ үксээтин!
Дууһаҕа туттарыллыбыт
Дьоҕуру сайыннарар,
Талааҥҥа тайаннарар
Дьолгут туоната туругурдун! Читать далее «Алгыс»