Үтүө күҥҥүт үүммүтүнэн,
Бэлиэ кэмҥит кэлбитинэн!
Өрөгөйдөөх үбүлүөйгүт
Үүнэр үктэлэ үксээтин!
Дууһаҕа туттарыллыбыт
Дьоҕуру сайыннарар,
Талааҥҥа тайаннарар
Дьолгут туоната туругурдун!
Кэрэҕэ кэккэлэһиннэрэр
Кэрэ иитээччилэрдээх,
Дьоҕуру тосхойор
Дьоһуннаах уһуйааччылардаах,
Аҕыс кырыылаах алаһа дьиэҕит
Айбыт айыыһыта аргыстастын,
Тэнийэр тиэргэҥҥит тирэҕэр
Иитэр иэйиэхситэ эҥэрдэстин!
Үөрэтэр оҕолоргут
Өрөгөйдөрө үрдээн,
Талааннара тардыыланнын,
Иитэр оҕолоргут
Аартыктара аһыллан,
Иннилэрэ иччилэннин.
Туллаҥнаабат тууралаах,
Огдолуйбат олохтоох,
Эркээни хочотун хоннохтоох
Ходуоһунньуктара холлоннуннар.
Ыттар ыраас санааҕыт
Ымыыта ыксаластын,
Кэхтибэт кэрэҕит кэскилэ
Кэҥиир-сайдар кэрэһэлэннин.
Сайдар олох саргытынан салайтаран,
Үүнэр үйэ үктэлинэн үрдээн,
Кэлэр кэм кэрэтигэр киирэн
Оҥоһуллар олох олугар олорсуҥ.
Анаарар алгыһым
Арчытын анаатаҕым,
Иччилээх тылым
Илгэтин иҥэрдэҕим буоллун.
Уруй-туску буолуохтун!
Дьол-соргу тосхоллонуҥ!