Токкоолостум тосхолу тоҕойу
Түөстүм төлкөнү түөрэҕи
Быстахтан быыһанар былаҕайы
Өлүүттэн өрөһүнэр өрүтү
Өспөт өллөөх өйдөбүлү
Кэлбит кэрэ кэрчиги
Үүммүт үтүө үнүгэһи
Ылбаҕай ырай ыйыытын
Алыбтаах айыы айхалын
Олордун оройгор олоххор
Эрэл итэҕэл илдьитэ
Эстибэт эрчим илгэтэ
Быстыбат быйаҥ быата
Төлкөлөөх төрүт буор
Симэлийбэт симэҕин сиҥэтэ эбит
Иллээх-эйэлээх эҕэрдэ
Эйэҕэс эйгэ элэ
Сымнаҕас сыһыан сыһыма
Төлөһүйэр төлкө түөрэҕэ
Айыы тыынын алгыһа эбит
Үүнүү-сайдыы үлүмэ
Өргөстөөх өркөн өй үлэтэ
Дьол-соргу тутуллар туоната
Билгэ бэрийиллэр биһигэ
Бэриллибит бэлэҕэ бэйэҕэр эбит
Айар тутар алгыстаах алыба
Айыы киһитин арҕастаах анала
Күн киһитин көнтөстөөх күөнэ
Оломноох олох, охсуллар оҥкула
Иитиллэр иэс ирдэнэр иҥэһэтэ эбит
Сүбэнэн-аманан сүрдэнэр
Күн киһитин өспөт өйдөбүлэ
Айыы киһитин ахтыллар анала эбит
Ийэ-сир күндүтэ, орто дойду дьоло
Ууруллубут уруйа
Айыллыбыт айхала эбит.
Уруккуну уруйдуур
Ааспыты айхаллыыр
Кэлэри кэрэхсиир
Сирдээҕи сигили ситимэ
Кэнэҕэски кэм кэрдии кэскилэ эбит.