Алгыс

Үтүө күҥҥүт үүммүтүнэн,

Бэлиэ кэмҥит кэлбитинэн!

Өрөгөйдөөх үбүлүөйгүт

Үүнэр үктэлэ үксээтин!

Дууһаҕа туттарыллыбыт

Дьоҕуру сайыннарар,

Талааҥҥа тайаннарар

Дьолгут туоната туругурдун! Читать далее «Алгыс»

Айылҕа хардата

Хоргуттаҕына — холумтаҥҥа чоҕу чохчолообот,

Итиитинэн илгийбэт, сылааһынан сыдьаайбат.

Хомойдоҕуна — боруогу бобон,

Хонууга хоннорор, сыһыыга сытыарар.

Кэлэйдэҕинэ — ситими силэйэн,

Кэхтиигэ киллэрэр, самныыга салайар.

Өһөөтөҕүнэ — силиһи быһан,

Төрүөҕү төнүннэрэр, эһэр эҥэрдэнэр.

Ахсарбатаҕына — төлөнү сөҕүрүтэн

Далы далбыйар, ыыры ыһар.

Өһүргэннэҕинэ — үүнэри үтэйэн,

Силиги симэлитэн, сэккэ сиэтэр.

Атаҕастыырга — кыылы кыйдаан,

Аартыгы алдьатан, аакка атаарар.

Сэҥээрбэтэҕинэ — үктэли кылгатан,

Кэрэгэй кэрчиктиир, быһаҕас быалыыр.

 

Астыннаҕына — аартыгы арыйан,

Ыллыгы ыпсарар, ымыыны ыллатар.

Сөбүлээтэҕинэ — сүрэҕин туттаран,

Сиэри ситэрэр, дьолу тосхойор.

Үөрдэҕинэ — өйү үүннэрэн,

Үктэли үксэтэр, кэскили кэҥэтэр.

Хайҕаатаҕына — төлөнү төлөһүтэр

Үйэни уһатар, тэлгэһэни тэнитэр.

Сүгүрүйэргэ — ийэ кыылы иҥэрэн,

Сиэтэр сирдьит буолар, олоҕу оҥорор.

Көрдөһөргө — үүнэри үөтэн,

Төлкөнү төлөһүтэр, төрүөҕү түстүүр.

Биһирээтэҕинэ — бити бэлэхтээн,

Сайдыыга салайар, кукка куустарар.

Манньыйдаҕына – маанылаан,

Бааты байытар, баайы баайар,

Тускулу туттарар.    

Инники олохпор, Айыы

****

Инники олохпор, Айыы тыынынан иитиллэр иччилэрбэр, ыраастанар ыырбар, ытык сүбэлээхтэрбэр. Махтал. Билинии соргутун суруйдум!

 

Орто дойдуга

Айыы тыыннанан

Айыллыбыт аналбар

Ууруллубут утуммар

киһилии кииннэнэн

Дьоннуу дьоллонон

Олорор олохпор

Охтубат оҥоһуубар

Махтанабын манньыйа

Айбыт араҥаччылаабыт

Амарах аҕабар!

 

Махтана саныыбын

Өйдөөн хаалбатах

Биһигин билбэтэх 

Күн сиригэр

Ийэм эрэйдээххэ.

Толору тосхол

Билгэ бэлэҕин

Бэрийэн биэбэйдээн

Күнү көрдөрбүт

Сүппэт-өспөт

Үтүоҕүн өйдүүбүн!

Тулаайах хаалан

Муҥу эҥэрдэһэн

Тулуур-дьулуур

Буһар-хатар

Кыстыгар эллэнэн

Эрэл — итэҕэл

Киин кэбиһиибэр

Тыйыс да буоллар

Очурдаах олохпор

Дьылҕабар махтанабын!

 

Дьоҕуру-идэни

Айар-тутар

Алыбы анаабыт

Аар айыыларга!

Илбийэр — имэрийэр

Эмэгэттээх эйгэбэр!

Ылгыыр — ыраастыыр

Арчылаах айылҕабар!

Сүгүрүйэбин сүдүлэргэ!

Барҕа махтал

Буолуохтун үйэлэргэ!!!

 

Тирэх Уйбаан 27.11.2017

Күөрэйэ көтөр

****

Күөрэйэ көтөр

Кирийэ киирэр

Күлүм күннээх

Очурдаах олохтоох

Орто дойду

Түһэр тахсар түһүгэр

Киһи аймах киэлитигэр

Дьоһун дойду туонатыгар

Или — эйэни иилиир

Ийэ Сири иччилиир

Үлэхтээх үйэни үүннүүр 

Сүбэни-аманы туругурдар

Күн киьитин күөнэ 

Айыы айма5ын анала

Дойду дьонун тутула

Тосхойор дьол тоҕойун

Толорунар тоскула эбит!

 

Айыы сирин

Арҕастаах аартыгар

Арчынан айхалаанар

Айыы тыынын

Алыптаах аналынан

Аар аймаҕын

Кэскил киинин

Ситэр сиэрин

Туолар туомун

Төлөһүйэр төлќөлүүр

Төрүт түөрэхтээх

Аһыныгас айылгылаах

Уйан уйулҕалаах

Айыы аймаҕын 

Айыллар аартык

Сүрэхтээх сүмэтин

Алгыстаах анала — эбит!

Күн сиригэр

Күн өйө күндүлээх

Күн көҕө көтөллөөх

Күн киһитин

Кэрэмэн кэрэтин

Үлэнэн үүнэр

Үйэ үктэлин

Сөҕөрүйбэт сүбэтин

Сүппэт сүрүн

Сүрэххэ сөҥөрөн

Олох оҥкулун

Оройугар охсунар

Күүстээх өй

Кытаанах санаа

Көмүскүүр күөн

Күн киһитин

Кэһиллибэт кэриэһэ — эбит!

Айыы сиригэр 

Айыллыбыт аналга!

Күн сиригэр

Кэбиһиллибит кэскилгэ!

Орто дойдуга

Олорор оҥоһууга!

 

Барҕа махтал буолуохтун!

Аар айыыларга!

Үрдүкү күүстэргэ!

Куйаар куттаахтарга!

Сирдэҕи сигили ситиминэн.

Дойдутааҕы туом тутулунан.

Аҕа айылҕа аналынан

Уруй — туску

Айхал — мичил

Эҕэрдэ буолуохтун!!!

Дом. Дом ини Доомм — 

торҕото тубустун!

 

22.11.2017 с. П.к.